Sjómannadagsblað Austurlands er komið út og er það 17. árgangur blaðsins sem líkt og undanfarin ár er um 90 blaðsíður að stærð. Hátt á annað hundrað nýrra og gamalla ljósmynda, vítt og breitt frá Austurlandi, prýða blaðið en efnistökin eru sem fyrr sjómennska og útgerð, fyrr og síðar.
Á meðal efnis í blaðinu í ár er ítarleg grein eftir Smára Geirsson um mikla svaðilför áhafnarinnar á Gerpi NK í ársbyrjun 1959 en ferðinni var þá heitið á Nýfundnalandsmið. Á leiðinni fékk Gerpir á sig brot og varð fyrir miklum skemmdum og undir lok veiðiferðarinnar skall síðan á hið mannskæða Nýfundnalandsveður. Magnús Þór Hafsteinsson leyfir lesendum að skyggnast í væntanlega bók sem hann er að skrifa um Íshafsskipalestirnar á fyrri hluta síðari heimsstyrjaldar en saga Íshafsskipalestanna lýsir fjölmörgum harmleikjum sem áttu sér stað í miskunnarlausum stríðsátökum. Ómar Bogason fjallar um farsæla útgerð Gullbergs á Seyðisfirði í liðlega hálfa öld og rifjuð eru upp ein hörmulegustu sjóslys er orðið hafa við Íslandsstrendur er 14 franskar skútur rak á land við Hornafjörð árið 1873. Alþingismaðurinn Tryggvi Þór Herbertsson segir nokkrar sögur frá því er hann var polli á Norðfirði og Fáskrúðsfirðingurinn Albert Kemp rifjar upp í máli og myndum vetrarvertíð í Vestmannaeyjum 1965. Eskfirsku sprengjusérfræðingarnir er yfirskrift greinar þar sem sagt er frá þýskri flugvél er fórst í Reyðarfirði fyrir 70 árum. Flugvélin bar tvær öflugur sprengjur og sprakk önnur þeirra er vélin hafnaði í klettum við Valahjalla en hin sprengjan lá ósprungin í fjallinu í 35 ár; allt þar til ungir menn á Eskifirði gripu til sinna ráða. Þá fjallar Stöðfirðingurinn Kjartan Guðjónsson um háska sem áhöfnin á Verði SU-550 lenti í er ofsaveður gekk yfir suð-Austurland 1953 og fleira mætti nefna.
Blaðið kostar 990 krónur en Sjómannadagsblað Austurlands greiðir sendingarkostnaðinn; kaupendur greiða einungis fyrir blöðin sem þeir kaupa. Þegar smellt er á hnappinn PANTA BLAÐ hér að neðan opnast tölvupóstur sem berst til Sjómannadagsblaðs Austurlands þegar hann er sendur. Eftirfarandi upplýsingar þurfa að koma fram í tölvupóstinum:
Nafn
Heimilisfang
Bæjarfélag og póstnúmer
Kennitala
Fjöldi blaða sem óskað er eftir
Greiðslu fyrir blaðið á að leggja inn á þennan reikning:
Banki 1169
Höfuðbók 26
Reikningur 10012
Kt. 120764-2849
